கண்ணிநுண் சிறுத்தாம்பு

மதுரகவி ஆழ்வாரின் பதினொரு பாசுரங்கள் பெருமாளை நேரே பாடாமல், தமக்கு எல்லாமுமான தம் ஆசார்யர் நம்மாழ்வாரைப் பாடுகின்றன. ஆசார்யரிடம் கொள்ளும் முழுமையான பக்தியே உறுதியான புகல் என்னும் ஆசார்ய அபிமானத்துக்கு இவையே எடுத்துக்காட்டு. நாதமுனிகள் திருக்குருகூரில் இவற்றைப் பன்னிரண்டாயிரம் முறை ஜபித்து முழுப் பிரபந்தத்தையும் பெற்றார்; ஆகவே நாலாயிரமும் இந்தப் பதினொன்றின் வழியே நமக்குத் திரும்பக் கிடைத்தன என்கிறது ஸம்ப்ரதாயம்.